政壇：搞搞政：老鴿黃成智撐袋住先 AV仁懶辯論出招滅聲
民主黨（白鴿黨）喺政改問題上愈走愈激，但黨內先後有狄志遠同李華明表態支持「袋住先」，尋日輪到該黨前立法會議員黃成智再開炮，撰文批評堅決反對方案嘅黨友唔合邏輯，結果激進派把持嘅白鴿黨急發聲明反駁，該黨立法會議員何俊仁（AV仁）仲諗咗個封嘴大計添。
鮮有就政改議題出聲嘅黃成智話，如果否決政改方案，下任特首仍然會由小圈子選出，一個全無認受性嘅特首，又點會有動機修改「八三一」決定呢？而且，唔少民主國家都唔係只靠首長選舉，民主國會同公民參與亦至為重要，所以泛民應該同中央繼續談判。通過今次嘅方案唔止可以令香港處境唔再壞落去，亦可以喺後年特首選舉時，透過全民投票有效咁發動新一輪民主運動。
會員大會表決 統一立場
黃成智喺文中仲兩次點名質疑取代佢出戰立法會新界東直選嘅白鴿黨總幹事林卓廷，話林反對「袋住先」嘅立論不合邏輯。
黨內有異議，真正民主嘅做法係辯到明、爭取對方支持，或舉行黨內意見調查，但白鴿黨卻發聲明否定黨員之說，AV仁仲話，嚟緊嘅白鴿黨會員大會，除咗會就係咪發動辭職公投表決，佢亦考慮提出一個否決「八三一」框架下嘅政改方案議案，希望黨內有統一立場喎。
