政壇：伊朗大廚精製台灣牛肉麵

好多人趁復活節去台灣鬆一鬆，牛肉麵係港人至愛嘅台灣美食之一，原來今年台北國際牛肉麵節已邁入十周年，台灣觀光局香港辦事處尋日特登來港搞咗個活動，佢哋請咗八位冠軍台灣牛肉麵大廚到港，一連三日喺荷里活廣場大騷廚藝。市民只需捐二十蚊畀港澳台灣慈善基金會，即可一嘗食材原汁原味空運到港嘅台灣金牌牛肉麵。

錢立祐及鄭正中（右及中）激讚伊朗大廚阮大為（左）嘅牛肉麵。

尋日下午舉行開幕禮後，台灣觀光局香港辦事處主任巫宗霖、中華航空香港分公司總經理傅小雯同港澳台灣慈善基金會永遠榮譽主席錢立祐等人，喺台北市牛肉麵交流發展協會理事長鄭正中帶領下，穿梭各攤檔逐一試味。巫宗霖話香港舖租太貴，台灣業者都係唔敢跨海嚟開分店。

八位金牌大廚之中，有一位樣貌鬼鬼哋嘅師傅阮大為，原來佢係伊朗人，喺台灣定居二十幾年仲娶咗台灣太太，難怪講國語勁流利。阮大為話佢原本去台灣做生意，後來改賣牛肉麵，事關台灣牛肉麵係佢至愛，佢仲將波斯香料等中東佐料加入湯底，創意十足。