政壇：80後利東邨「民」夾擊乳鴿
香港仔利東邨過去多年都由建制陣營盤據，直至上屆區議會選舉首次畀民主黨（白鴿黨）兩位新人區諾軒同羅健熙突圍，連奪利東一同利東二兩選區，令利東邨由「紅變綠」。為咗收復失地，建制派大黨民建聯決定師夷長技以制夷，派番兩名八十後挑戰呢兩隻「乳鴿」，兩名挑戰者本身仲係當區居民，其一為漁民子弟，望重奪有唔少蜑家人嘅利東邨居民芳心。
兩名八十後「老街坊」彭兆基（左）及李嘉盈，雙雙出戰利東。
兩名新人彭兆基同李嘉盈雖然都好後生，但同時係當區嘅「老街坊」，其中彭兆基仲係漁民子弟，最近加入咗多個漁民組織，須知唔少利東邨居民都係昔日靠泊香港仔避風塘嘅蜑家人，擺明係想打另類鄉情牌。
至於李嘉盈，據聞更係民記南區支部主席楊位款親自挑選嘅。楊位款形容自己係「好識之士」，不過係「知識」個「識」，兩名新人都擁有高學歷，但同時願意全職服務居民，非常難得。面對民記夾擊，我哋問過身兼白鴿黨副主席嘅羅健熙有咩回應，佢就暗諷對手只識搞「蛇齋餅糉」，冇乜實際地區工作經驗喎。
