政壇：佔領遺禍星唱衰香港
佔領行動為時七十九日，為香港社會帶來好大衝擊，連港人引以為傲嘅法治精神都大打折扣，呢個禍害唔係嗰場行動結束咗就冇事，有政府中人透露，佔領行動之後，一直視香港係競爭對手嘅新加坡「趁你病，攞你命」，喺多個海外論壇「唱衰」香港，搞到政府都要打醒十二分精神進行消毒，所以財政預算案都要向旅發局同新聞處撥出三億元。
發起佔領行動嘅佔中搞手戴耀廷本身係法律界中人，獅子山下畀佢哋累成咁，真令人氣憤。
香港同新加坡多年嚟都係競爭對手，由七十年代起，連同南韓、台灣被稱為「亞洲四小龍」，星港亦被指係「雙城記」。新加坡一直羨慕香港背靠中國內地，近年着力吸引人才，務求同香港爭一日之長短。
港府擬派員出席「(目及)實」
點知呢個機會就係由香港自己雙手奉獻畀獅城。有政府中人透露，佔領期間，新加坡喺多個海外仲裁會議「唱衰」香港，理由不外乎話香港最近政局因為佔領行動而不穩，更致命嘅就係香港人無視法律，尤其係之前有人倡議唔使遵守法庭嘅民事禁制令。
據知，呢啲海外仲裁會議未必次次都有香港官方代表出席，所以唱衰者無所顧忌。不過獅城計漏咗，有部分會議組織者係香港人，所以獅城官員呢啲唱衰言論好快就傳番去港府官員耳中。聽聞港府檢討後，認為唔應該一直捱打，所以決定之後若果有類似會議，都會盡量派出官方代表睇實啲，起碼等獅城官員想講香港壞話時，都唔會太過分。但係講咁耐，其實最緊要都係香港爭氣，咁人哋想點唱衰都冇彈藥啦！
