公僕爭樓內訌 房屋死結難解

件事係咁嘅，根據港府內部不成文規定，紀律部隊人員可以喺即將退休或者退休之後申請編配公屋，安享晚年，而居住宿舍嘅退休人員可以喺申請公屋後兩年繼續住宿舍，如果兩年後仲未遇到心儀公屋，就要搬走，騰出宿舍畀新來者。依家嘅問題係，公屋供應嚴重短缺，而消防處近年又湧現退休潮，大批退休員佐級人員遞紙申請公屋，可惜僧多粥少，至今仲有約一百人因為未有公屋而拒絕遷出宿舍，新入職人員望穿秋水，有人等咗十二年至獲分配宿舍，搞到怨聲載道，互相指摘。消防處急急補鑊，月前發信迫令五名退休人員搬出宿舍，點知順得哥情失嫂意，被資深員工批評漠視下屬福利。

消防處管理不善，對屬員房屋問題後知後覺，結果引發部門內訌，打擊士氣，固然抵鬧。之不過咁，退休公僕違規霸佔宿舍亦幫唔落，如果個個都係咁，豈不是天下大亂？正如有人話齋，退休公務員獲編配公屋只係酌情福利，唔保證一定成功，點能夠好似社會欠咗佢哋呢？即係咁，政府體恤退休公僕無可厚非，但亦要平衡社會利益，唔可以淨係照顧公務員，而罔顧其他市民利益。講到底，只有大量增加公屋配額，畀各階層市民有同等機會上樓，咁至公平合理吖嘛。

所以話，講嚟講去都係老問題，房屋供應短缺，無論點樣分配，都係有人歡喜有人愁。日前新一期居屋攪珠，推出嘅單位只有二千幾個，結果吸引逾十三萬人申請，白表申請者中籤機會仲難過中六合彩，好多無殼蝸牛連被人迫遷嘅機會都無吖。

當然，港府唔係唔想增建房屋，而係受到政客刁難，加上不同利益團體阻撓，拓土建屋寸步難行，莫講公屋成為搶手貨，連劏房都爭崩頭，呎價媲美豪宅，試問無殼蝸牛點可能唔愁爆吖。

總而言之，房屋問題唔止係民生問題，亦係社會同政治問題，當局如果唔想民怨爆煲，就要速速諗計拆解困局。咪話太一叮唔提醒，近年各個紀律部隊都爆發退休潮，申請公屋嘅人肯定有增無減，再唔大量增建房屋，小心變成另一個施政炸彈吖，叮！