太子珠寶鐘錶執行董事朱繼陶嘅女兒兼歌手Khloe朱紫嬈尋日下晝出席鐘錶品牌活動，被問到爸爸從事鐘錶生意，佢幫其他鐘錶公司宣傳會唔會唔太好呀？Khole即笑住話唔會，仲話：「Daddy已經退休，而且一直以嚟我都無理，佢需要我幫忙就會出聲。我唔會避忌，佢冇講即係唔使，我自己都有工作㗎嘛！」

朱紫嬈話爸爸從來冇叫佢幫自己嘅鐘錶公司宣傳。

提到即將表演嘅舞台劇，Khloe透露現正排練四月公演嘅舞台劇，佢直言到時會唱多首經典組合Beyond嘅金曲。對於現時Beyond搞到如此分裂，佢會唔會覺得傷心？佢話：「唔會，好音樂大家應該記得同懷念。」

雖然依家忙於舞台劇，但Khole透露唔會因此而唔唱歌，前排佢就錄起歌曲《大愛》，佢話：「呢首歌做關愛機構嘅主題曲，宣揚愛就要大聲講出嚟。我愛我嘅屋企人、工作上嘅夥伴、朋友。」咁男朋友呢？佢話：「如果有，我都會愛佢。如果有（男朋友）會話畀大家知。」

第一手消息請下載on.cc東網iPhone/iPad/Android/Windows Phone Apps