政壇：學生會「成語信」批鬥李國章
香港大學學生會尋日發表一封致港大校務委員會成員李國章嘅公開信，信中堆砌大量四字成語指罵李國章，指其上任半個月已大放厥詞、無的放矢，喺欠缺真憑實據下批評港大教師不務正業，令港大瀰漫白色恐怖，故要求李國章收回言論，並辭任校委一職。李國章就回應話：「我做錯咩？」
公開信由頭到尾係咁數落李國章，指佢行事作風專橫霸道，任職教育統籌局局長時令教育界人心惶惶。喺○七年教育學院風波中，為強迫教院與中大合併而公然濫權；去年罷課期間更揚言要參與者退學明志，抹黑學子關心社會之義舉，足見李國章順我者昌、逆我者亡嘅跋扈氣燄。信末又指李空降港大校委，實為「厚顏無恥，尸位素餐」云云。話時話，香港學生嘅中文水平一向被指麻麻，呢班學生都算有讀書，但攞嚟做批鬥，似乎學非所用囉！
此外，據悉港大校委會尋日會議有討論涉及法律學院副教授戴耀廷嘅捐款風波，有委員曾表示希望擴大審核委員會嘅權限，可向有關人士提出懲處。不過，審核委員會主席黃啟文認為，校方應尊重委員會嘅專業報告，最後校委會決定審核委員會只需就上次提交的報告作出elaboration（詳細闡述），預計可在四月內完成。
