政壇：力撐亞投行CY籲咪拉布
近日財金界嘅熱話都離不開亞洲基礎設施投資銀行（亞投行），特首CY梁振英尋日出席行政會議前話，好早之前，特區政府已經向中央表示對加入亞投行持十分積極態度，如果有決定就會盡快公布，仲話若要提交立法會審議，希望少數慣性「拉布」嘅議員停止「拉布」，而部分經常姑息「拉布」議員嘅議員，都唔好姑息呢啲「拉布」行為。
不過，有多次「拉布」前科嘅人民力量議員陳偉業就質疑政府患有「拉布恐懼症」，唔解釋香港加入亞投行嘅角色同需要，就叫議員唔好「拉布」係愚蠢同不智，相信立法會唔會咁易通過喎。
其實唔少國家已經紛紛申請加入亞投行，而日本同美國就到依家都冇參與，財經事務及庫務局局長陳家強亦明言香港加入亞投行「絕對有好處」，如議員執意反對，難免令人猜想佢哋係向美、日勢力靠攏，要同美、日兩國同聲同氣。
