政壇：周群飛強勢登中國女首富
深圳有個創業板，大家應該知道；嗰度有間公司藍思科技上市咗冇耐，大家或者未知；藍思科技女掌門周群飛，已爬過咗碧桂園「楊千金」楊惠妍頭，成為新嘅中國女首富，就點都要知啲啲喇啩；呢位中國新女首富係香港永久居民，知冇！
隨着股價暴漲，周群飛嘅身家已超過四百二十億人仔。（設計圖片）
睇番深交所啲資料，話呢位中國新女首富一九七○年出世，即係今年四十五歲……大學專科學歷……係「中國香港永久居民」，身份證號碼R******（*），咦，「R」字頭？若講緊係香港身份證，根據香港入境事務處話，「R」字頭即「持證人擁有香港入境權」，即係？自己諗啦。
話說呢間藍思科技，係今個月十八號先喺深創板掛牌，到尋日係第九日上市，但就升足九日，之前嗰八日仲升到停牌添！佢哋女掌門周群飛本身係大股東，身家隨股價暴漲，以尋日股價計，周掌門身家逾四百二十億人仔。
中國女首富係點煉成嘅呢？官方講法係：九三年（即係二十三歲）入玻璃加工行，「經長期實踐積累掌握了豐富的行業經驗」，到○三年（三十三歲）就創辦咗深圳藍思……。嗱，通常富豪背後都有段不為人知嘅奮鬥史，網上傳話，周掌門出身湖南農村，十五歲出城落咗深圳工廠做打工妹，跟住……然後嫁咗畀……兼做女強人……總之就係經過無比困難咁奮鬥落去，先有今日。
