政壇：信誠春茗 潮玩航拍助興
信誠證券日前搞春茗聯歡晚會，嗱，抽獎、遊戲、明星獻唱呢啲往年都見過，亦見慣。但係今年唔見隻醒獅出嚟舞嘅？咦，轉咗玩航拍助興！果然與時並進。
信誠劉昇昂（右三）及太太（右四）同管理層們向賓客祝酒。
隻航拍機經過精心設計，用揮春紅紙包到成隻紅噹噹。
今次信誠喺春茗首次用航拍進行亮燈儀式。即係點？即係將螢光棒裝喺航拍飛機上飛囉。隻航拍機經過精心設計，用揮春紅紙包到成隻紅噹噹。總之寓意「生生猛猛、愈升愈有」，認真有新意。
據知，滬港通信誠一直有做緊，咁嚟緊嘅深港通呢？信誠證券董事總經理劉昇昂話「我哋研究緊深圳股票板塊，亦會搞多啲呢方面講座」，劉老闆仲話唔好等商機喺你面前經過幾次先察覺到，要喺嚟之前就研究好點做。
咁iBond呢？上年信誠嘅iBond客超過一萬個，今年目標？劉老闆話兩萬個，客戶認購優惠（100%借貸、零按金、零利息、提供回購價）繼續之餘，仲會加碼獎勵搵到較多iBond客嘅經紀同事。佢仲笑話，經紀們唔好累佢蝕利息呀，事關若以劃一嘅三萬蚊iBond孖展貸款計，目標兩萬人申請，即係信誠要預留六億元資金！啲息都幾襟計。
