政壇：譚志源為AV仁 預留兩億
仲記得喺五年前，泛民主派搞五區辭職變相公投，最終使咗近一億五千萬元公帑，當年政府仲因為呢單嘢，要上立法會財務委員會申請追加撥款。事隔五年，白鴿黨嘅立法會議員「AV仁」何俊仁再次聲稱會搞辭職變相公投，而且會喺政改表決前辭職。雖然佢到依家都係得個講字，但政制及內地事務局就因為AV仁呢一句說話，今年即刻預留兩億元為可能出現嘅補選做準備。如果AV仁真係辭職，納稅人無辜辜使多兩億元血汗錢。
吸取教訓着「避彈衣」
一句說話，隨時令政府庫房無咗兩億元，絕對唔係講笑。AV仁只係出口術話會喺政改表決前辭職，藉此引發變相公投。政府已經要幫佢埋單計數，預留兩億元做準備。大家可能心諗，AV仁都未辭職，到佢真係辭職先算啦，點解要咁早留定筆錢呢？
當年泛民搞五區辭職變相公投，五區都要補選，成個選舉開支要億幾，殺政府一個措手不及，結果政制局內原定預算唔夠錢搞補選，最後要上立法會財委會申請追加撥款，當年處理呢件事嘅政制局局長林瑞麟，幾經辛苦先爭取到立法會財委會支持，否則又會惹來泛民攻擊。
可能現任局長譚志源知道當年林瑞麟有幾辛苦，所以吸取教訓，點都預留咗筆錢先，而且一次過預留兩億元咁多，應該夠搞補選有餘，如果AV仁唔辭職，當然皆大歡喜啦，筆錢亦可以留喺第二度用，就算AV仁敢辭職，譚志源亦唔使周圍撲水，總之着住呢件價值兩億元嘅避彈衣，點都有利而無害啦。不過，如果個個議員口噏噏就話要預留撥款，真係好唔得閒。
