香港高校唔得掂 內地學霸唔敢來

點解咁講？咪就係令人生畏的內地學霸對香港院校興趣大減咯。嗱，自從○五年本港有大學參加內地高考統招以來，來港就讀嘅內地生節節上升，由最初二百幾人增加到舊年一千六百人，不過時移勢易，熱潮漸退。好似港大咁吖，前年收到一萬二千多份內地生入學申請，舊年靜雞雞縮水得番「逾萬人」，其他幾間學校都唔好得幾多。好多大學以前收開北大、清華嘅分數線，依家都要紆尊降貴。港生升大學少咗競爭對手，你話係咪「好消息」吖。

點解內地尖子過門不入？有內地官媒係咁分析嘅。一來內地生唔適應本港語言、教學方式；二來學費年年加價；三來香港與內地矛盾升溫，唔少家長擔心小朋友來港求學會受到歧視咁話。

咁講啦，頭兩個原因其實都係次要，中港矛盾至係癥結所在。畀得子女出國留學，梗係想佢哋體驗唔同嘅文化，擴闊視野o架啦，香港以往受內地家長歡迎，咪就係因為中西文化薈萃囉。至於話學費貴，只要物有所值，教學質素有保證，家長多多錢都捨得花。所以咯喎，內地生對香港望而卻步，講嚟講去都係因為中港矛盾愈演愈烈。今時今日香港排內情緒愈來愈高，唔係驅蝗就係反水客，激進分子見人就鬧，見篋就踢，內地生嚟香港讀書，人身安全毫無保障，做父母嘅邊個敢博吖。此地不留人，自有留人處。世界上一流大學多的是，何必特登嚟香港畀人歧視，受人白眼吖。

講開又講，本港大學國際排名好似王小二過年咁，正正係因為政治入侵校園，做老師嘅誤人子弟，鼓吹學生違法有理，做學生嘅愈來愈激，醉心街頭鬥爭，教育質素唔倒退至奇。呢，北大、清華等內地名校國際排名已經爬咗港大頭，年前有位遼寧尖子放棄港大學位而選擇去北大讀書，咪就係用腳投票囉。

所以話，內地生買香港怕，表面上港生入大學競爭細咗，實際上反映香港社會泛政治化，連帶造成專上教育質素插水。再咁落去，香港殘餘嘅競爭力都冇埋，盞自己玩死自己嘅咋，叮！