小米創辦人雷軍滿肚密圈搞作多多，就快係一年一度嘅「米粉節」，小米趁五歲生日會發布幾樣新產品，一班「米粉」都好想知坊間傳得好行嘅小米自家移動支付係咪真係出。尋日朝早小米懶神秘喺官方微博貼啲「暗號圖」，一班心急米粉就爭住估係乜。其中一幅圖上面有隻飛天豬仔錢罌，又有個人幣銀仔，仲有個暗號「AA」。有人估AA制，有人估智能錢罌，仲有人心邪估「愛愛」，話可能係出「小米Domdom」添！

雷軍黑老西造型。（互聯網圖片）

雷軍喺微博上載佢同黃曉明合拍嘅電影海報。（互聯網圖片）

上載黑老西造型

其實，坊間一直傳小米會推自家移動支付技術，有米粉喺小米手機內置嘅小米錢包App，發現「貨幣基金」服務測試版，換言之嚟緊可以用App買基金。目前測試版只有呢款「易方達天天理財基金A」，年收益有成百分之六點四三七，仲高過餘額寶。

雷軍嘅風頭，又點會畀小米搶到！佢個人微博尋日貼咗一張同男神黃曉明合拍嘅電影海報，上面有疑似片名《風口》。佢又話自己第一次拍戲，拍咗幾個鏡頭，仲得黃曉明教佢做戲。搞邊科？總之就同北京國際電影節有關喎。雷軍成身黑老西造型，襟前插住朵玫瑰，仲專登染咗幾條白頭髮，Chok到！

第一手消息請下載on.cc東網iPhone/iPad/Android/Windows Phone Apps