近期反水貨客嘅「光復」行動接二連三,有聲音希望邊境購物城同前海嘅港貨中心可以盡快落成,解決水貨客對本港居民帶來嘅困擾,嶺南藥廠總經理Coty呂偉強話,業界最關注嘅始終係假貨問題,盼望有關部門嚴厲執法,確保售賣嘅係正貨,否則邊境購物城變成「假貨城」就弊喇!

呂偉強(右二)希望有關部門嚴厲打擊假貨,李應生(右一)、李嘉倫(左二)及商會副理事長陳自宏都表示認同。

鄧梅芬忙於開旗艦店。

李俊文(左)現身與業界交流,旁為商會副理事長許玉漢。

香港中華製藥總商會(商會)早前舉行新一屆理監事就職典禮,城中知名老牌藥廠齊集,講起近排熱議嘅邊境購物城,身為香港中華製藥總商會理事長嘅Coty話,香港製造嘅老牌藥品受惠於內地客,若設立專區畀內地客購買港貨,業界梗係支持,但前提係要確保係正貨,事關消費者食咗假嘢當真嘢,到時認真大件事。

藥材輪流升價

在場嘅仲有身兼商會首席會長嘅李眾勝堂保濟丸藥廠掌門人李嘉倫、京都念慈菴總經理謝國昌、位元堂執行董事Karen鄧梅芬、百成堂主席李應生同兒子Thomas李俊文等人,其中Karen話,反水貨示威令公司屯門、上水等分店生意受挫,幸好業主肯傾減租。

雖然內地客對本港零售業好重要,Karen話內地客只佔集團營業額約三成,透露將會喺銅鑼灣開旗艦店,以打造國際品牌形象。

對於近年百物騰貴,身為百成堂第四代後人嘅Thomas話原本家庭常用嘅湯料藥材價格好平穩,但前年川貝售價突然急升,去年就輪到淮山同杞子勁升三成,幸好今年尚算平穩。

第一手消息請下載on.cc東網iPhone/iPad/Android/Windows Phone Apps