政壇：信銀國際出超豪黑卡

一張「黑卡」，絕對係身份嘅象徵。信銀國際都出咗張黑卡畀新成立嘅「鑽石財富管理」高端客。有幾高端？身家起碼要有四百萬港紙或三百萬人仔o架。

信行行長李慶萍（中）現身撐場。

呢張卡確厲害，開幕日就出動到信銀國際母行中信銀行行長同三位副行長撐場，好罕見。聽聞母行舊年畀咗個任務阿仔，特別係要搞得個私人銀行服務更有聲有色，今次阿仔推「鑽石財富管理」有成績，阿媽當然重磅撐場。

信銀國際執行董事兼替任行政總裁Helen吳秋玉話，依家內地有錢人好鍾意嚟香港投資，事關選擇多啲，所以母行各位高層都好重視跨境銀行服務。Helen希望成立「鑽石財富管理」後，母行繼續介紹多啲客仔嚟香港，目標係跨境高端客數目同資產喺未來三年翻五倍。