政壇：搞搞政：公文袋橫手拉布 想退黨難過上樓
喺選舉前後，政黨政團嘅離離合合可謂司空見慣，但最近有八十後嘅政界新鮮人何啟明身處夾縫有苦自己知，事關佢依家同時有公文袋同民協雙重成員身份，聲稱自從決定為民協効力後，一早有意退出公文袋，但之後不了了之，有政界中人更疑打抱不平，形容退出公文袋仲難過上樓，質疑有人拖延其退黨申請。莫非身為公文袋黨魁嘅「袋巾傑」梁家傑拉布夾硬留人，唔畀人轉會跟民協馮檢基？
何啟明喺中學時代加入公文袋做普通黨員，但佢自稱畢業後冇幫公文袋做嘢，反而走咗去民協打工。佢形容喺民協做咗幾年工作，發覺公文袋嘅風格唔多啱自己，有意為民協効力，甚至表明有意參加年底區議會選舉。
何啟明欲轉會民協
據聞民協喺舊年三、四月決定派佢落區做前期準備，當時佢先醒起仲係公文袋黨員，於是想盡快搞清楚黨籍問題，曾喺舊年暑假同公文袋港島區支部主席梁兆新提退黨要求，據知梁兆新當時知佢喺民協做緊地區工作，亦有問佢係咪想參加區選，反提出可安排佢落戶荃灣區，換取佢繼續留喺公文袋。
但何啟明最後決定退出公文袋，又透過電郵向該黨黨務部索取退黨申請表，不過黨務部一直冇作出回應，而佢對退黨一事亦冇再跟進。何承認喺事件上處理得唔係咁好，但盼望公文袋盡快處理佢嘅申請，費事畀人喺雙重黨籍問題方面借題發揮。
公文袋總策劃幹事歐陽志飛隔空回應，話公文袋至今未收到何啟明嘅書面退黨申請，知悉事件後已即時打咗畀佢，又話如果對方真係想退黨，最好盡快搵佢哋搞埋啲手續，因公文袋亦唔接受黨員有雙重黨籍。若果唔想今次風波升溫，睇嚟涉事各方要盡快「拆彈」嘞！
