政壇：袁國強撬卿姐票食檸檬
白鴿黨等泛民多個政黨表明會否決全國人大常委會「八三一」決定框架下嘅政改方案，政改三人組成員之一、律政司司長袁國強尋日再度接受白鴿黨主席劉慧卿嘅網台節目訪問，疑再度向白鴿黨「撬票」，呼籲卿姐唔好爭拗普選「真假」之別，仲叫佢「高抬貴手」，但最終都係食檸檬收場。
袁國強（左）再度向卿姐「撬票」又食檸檬。
袁國強話政改部分爭拗係「公說公有理、婆說婆有理」，由於時間無多，不如討論如何增加入閘階段嘅透明度，舉例指期間可進行全港性辯論，另外提名委員會都要經選舉產生，一樣面對民意壓力等。但卿姐反駁，話「真普選」係好重要，又提到立法會主席曾鈺成都公開叫中央回應「袋住先」係咪等同「袋一世」，但佢話最重要係要解決特首普選時是否符合國際標準。
對於外界要求承諾一七年特首普選非終極方案，袁國強隔空回應話，如果要政府作出修改承諾，或涉及法律問題，如應該搵邊個作承諾等。佢又話，如果由中央或者特區官員作官方表述令港人放心，就可以睇吓做唔做到。
