激進泛民近年多次發動拉布戰，其中慣用招數包括點算法定人數，建制派議員唔只一次批評有人利用議事規則漏洞拉布，其中工聯會議員Bill鄧家彪舊年曾去信議事規則委員會，希望委員會研究多招堵塞漏洞，點知最近得到回覆都係唔可行，但據聞阿Bill死心不息再度出新招防止流會。

鄧家彪又提出新招，希望減低流會嘅風險。（資料圖片）

據知最新招數係提議立法會主席係咪可以使用酌情權，每當有人無故要求點算法定人數時，主席可以暫時休會一陣，藉此減低流會風險。究竟係咪會被主席接納甚至採用，有人估計或者立法會大會稍後審議財政預算案時，就自有分曉。

講番阿Bill早前提出多招，好似當有人向主席提出法定人數不足時，主席係咪有權作出裁決；可否參考外國例子，唔容許議員發言時，有另一議員點算法定人數等，據知有關方面曾就此徵詢外面御用大狀意見，認為佢嘅建議唔可行，因此惟有暫時擺低唔考慮嘞！

第一手消息請下載on.cc東網iPhone/iPad/Android/Windows Phone Apps