政壇：政府App下載率慘不忍睹
為咗追上潮流，政府近年推出咗唔少App，除咗為市民提供資訊，又可以宣傳吓部門。但政府App嘅下載率都幾參差，一啲受歡迎嘅App，好似「我的天文台」，下載次數可以高達四十七萬幾；相反，一啲較少人認識嘅App下載率竟然不足一百次。嘩！搞成咁，商務及經濟發展局局長蘇錦樑係咪要搵熟悉呢瓣嘅特首創新及科技顧問楊偉雄救亡呢？
人民力量嘅立法會議員「慢必」陳志全尋日喺財委會特別會議上，提到政府App嘅成本效益問題。佢話近年好多政府部門都推出App，但下載率就好低，變相每次下載嘅成本好貴，又質疑政府係咪趕時髦、趁熱鬧、人有我有。
舉例話，漁護署個App去年嘅下載率只有十次，今年先略升至七百次，但情況都相當慘不忍睹；水務署舊年四月曾推出一個App，成本高達一百五十六萬元，但截至上月底，下載次數只有七千八百四十一次，即係下載一次要二百元成本。慢必話其實政府推出每個新App，搵番自己部門同事下載都唔止呢個數，建議下次可以搵多啲親戚朋友幫手，提高下載率。
佢又質疑下載率咁低，但政府部門依然樂此不疲咁出App，係咪局長或署長鍾意就可以批錢生產呢？
政府資訊科技總監林偉喬回覆時話，當局有提供指引，又不時舉辦分享會，方便各部門掌握要注意嘅地方。不過，照下載情況睇嚟，成效真係有待改善喇！
單為景賢里出四App
我哋再翻查政府回應議員預算案嘅書面答覆，發現政府推出嘅App部分成日重複，好似屋宇署嘅招牌舉報先導系統，單係開發成本已經差唔多十五萬元，而且每六個月仲要花一萬二千元同六萬九千元，作日常維護開支同軟件使用權之用，但下載次數只有二十八次；教育局亦有七個App，其中香港學童的眼睛護理只有三十三次下載，有二百幾次下載率嘅優質教育基金，日常維護開支竟高達十三萬二千元；而康文署單係為景賢里就出咗四個App，實在令人摸不着頭腦。
