城中鏡：單身鄺美雲過節照開工
尋日喺馬場見到珠寶商人Cally鄺美雲，佢為出賽第一場賽事嘅愛駒「甜蜜鑽石」打氣，可惜愛駒未能勝出，問到Cally可有失望，佢話：「少少啦，其實本身冇信心。」問到復活節有乜嘢節目？Cally話要喺office做嘢，所以會留喺香港，唔會出埠，由於冇時間兼且好多嘢做，五月有拍賣，所以嚟緊嘅復活節好忙。再追問回復單身後有無人追呀？佢就話：「無人追，邊有咁快。」
鄺美雲話復活節好忙，會留喺香港做嘢。
轉頭見到「玩具大王」蔡志明嘅兒子Karson蔡加讚單拖入馬場支持愛駒「車神」出戰第七場賽事，問到點解只得佢一個人嚟，佢話：「係呀，佢哋個個都唔得閒，今晚有好多Annual dinner。我嚟支持隻馬，而太太（汪圓圓）就喺屋企湊BB，同埋佢要裝身扮靚。」
再追問前晚係咪幫圓圓舉行生日Party時，Karson話：「唔係Party，朋友飲吓嘢，太太二十七號正日生日。至於送咗乜嘢禮物？你哋自己問佢。」Karson愛駒「車神」最終跑得第二名。
