政壇：搞搞政：學聯拒「普選」改革拖住先
喺佔領行動期間，香港專上學生聯會被指進退失據，其後進一步被踢爆內部決策透明度低兼財政混亂，各大院校陸續發動「退聯」公投，要求學聯改革更是呼聲高漲，包括一人一票普選學聯秘書長。不過原來學聯喺周年大會已否決普選學聯秘書長同秘書處嘅建議，理由係避免秘書處權力過大，其他改革建議亦疑採取拖字訣交畀工作小組去跟進。其實由新當選學聯秘書長羅冠聰領導嘅學聯，秘書處內部連一人一票都未做到，日後為市民爭取真普選又邊有說服力呢？
設計圖片及對白
新一屆學聯領導層尋日會見傳媒，羅冠聰承認學聯喺佔領期間出現人為問題，做決策時未有充分掌握同學意見，亦認同有必要改革部分制度。不過一句到尾，佢哋似乎都係講多過做。對於一批主張退聯學生要求普選秘書處，佢死撐話為咗院校自主，反對普選秘書處，學聯常委柯凱齡亦有同一論調，指為咗維持院校自主，避免秘書處權力過大，學聯周年大會已否決普選秘書處建議，至於其他改革建議，會交去學界改革檢討工作小組。
老鬼任董事 辯稱缺經驗
至於坐擁三間物業嘅學聯學生活動基金，被批董事一職由學聯老鬼擔任，新當選學聯副秘書長黃嘉輝承認，近幾屆學聯成員因缺乏處理商業程序經驗，所以唔識去轉番個名，以致落莊十幾年嘅老鬼仍然係公司董事，佢哋已就此着手改善，早前周年大會已選出新任學生董事，亦搞緊轉名手續。
學聯喺佔領期間籌得二百五十萬元，羅冠聰話會用喺政改運動上，亦可能成立基金；當問及立法會表決政改時有何行動，學聯稱未決定具體方案，又計劃透過公投制訂學界約章，制訂學聯於政治、經濟等方面嘅方向。
