佔領行動喺舊年底結束後，外界關注青年事務委員會主席由邊個出任，以協助政府掌握年輕人脈搏同所思所想，早前傳出多個熱門接任人選，包括菁英會創會兼榮譽主席Jaime施榮忻等人，最終新任青委會主席另有其人，意味即將卸任青年事務委員會委員嘅Jaime大熱倒灶。

消息指政府將委任施榮忻加入理大校董會做校董。（資料圖片）

不過，政治真係一日都嫌長，正當外界以為Jaime少咗一項公職時，消息指政府短期內會委任Jaime加入理工大學校董會出任校董，下月一日正式生效，算係攞番個安慰獎。

據知政府決定委任Jaime出任理大校董會校董，部分原因同佢從事嘅部分生意同理大有關，加上佢喺加拿大讀書，對外國大學發展有一定認識，預料Jaime加入理大校董會，有助提供外面經驗同意見，推動理大進一步國際化。

第一手消息請下載on.cc東網iPhone/iPad/Android/Windows Phone Apps