政壇：靚女「傘兵」戰區選鬥鼠王芬
喺美國、意大利、日本同韓國等國會，都有唔少專吸男性選票嘅靚女議員，呢個情況過往喺香港就唔多見，但希望在明天。喺佔領行動後成立嘅新組織「青年新政」，就有一位靚靚OL宣布積極考慮參選年底區議會，仲講明有意落九龍城黃埔東選區，向外號「鼠王芬」嘅當區現任區議員兼九龍西立法會議員梁美芬挑機。呢場世紀之戰，未開打都已經有睇頭。
游蕙禎
「青年新政」尋日舉行成立典禮，聲稱有過百名成員，年底將會派出八名「傘兵」參加區選，並主打本土路線，包括捍衞廣東話、強調所有政策港人優先，甚至認為連水電等必需品，香港都要自給自足等。但最令人眼前一亮嘅唔係超現實本土政綱，而係年僅二十三歲、笑起上嚟殺死人嘅「阿禎」游蕙禎。
阿禎畢業於嶺南大學中文系，大學二年級時獲派往一間親中報章實習，曾經採訪過特首梁振英嘅活動，畢業後佢本來諗住做個平凡OL，點知一場佔領行動令佢萌生從政念頭，咁啱有住黃埔嘅朋友同佢呻，話鼠王芬成日唔落區，鼓勵阿禎落去參選挑機。我哋call過梁美芬，想問回應，但佢好似唔喺香港聯絡唔到。
