政壇：鬍鬚曾預告將瘋狂外訪
話說香港早前已向中央提出，希望加入由中國倡議成立嘅亞洲基礎設施投資銀行（亞投行），但有個別崇洋親美、逢中必反嘅泛民主派立法會議員，就表明反對有關計劃，隨時會就加入亞投行所需嘅撥款申請進行拉布。財爺「鬍鬚曾」曾俊華尋日就喺網誌大力硬銷亞投行，並以佢前年帶領香港商界代表團訪問緬甸同柬埔寨做例子，話親身感受到兩國基建落後，亞投行可彌補由美國主導嘅世界銀行同由日本主導嘅亞洲開發銀行嘅不足，為亞洲發展中國家提供多一個融資渠道。
設計圖片及對白
憂「本土」淪排外自守
鬍鬚曾話亞投行同絲路基金係中央為咗推動「一帶一路」策略而成立嘅機構，佢認為「一帶一路」可為香港帶嚟好多發展機遇，計劃帶領香港商界出訪部分「一帶一路」國家，尤其係一啲新興嘅區域樞紐國家，希望今年秋天展開首個行程，變相預告自己即將會瘋狂外訪。
咁又係嘅，鬍鬚曾在任財爺已有八年，大部分發達國家都已訪問過，唔搵啲新理由同新景點，又邊有藉口再周圍飛呢？
近來鬧泛民鬧到上癮嘅鬍鬚曾，喺網誌尾段又筆鋒一轉，強調香港只有七百萬人口、一千平方公里面積，經濟上唔可能完全自給自足，必須透過與內地同世界各地通商交易，先能夠保住七百萬人口就業同生計。
對於近年喺香港社會出現咗唔少標榜本土嘅聲音，佢認為如果係解作保留香港嘅特色，佢並唔會反對，但係呢啲聲音似乎係夾雜咗愈來愈多排外同埋閉關自守嘅「噪音」，令到人相當擔心！因為香港其中一項最重要嘅特色，正正就係東西薈萃，能夠讓東西文化同埋價值喺香港融匯結合。
