學業前景樣樣煩 學生怎能不抑鬱

有大學聯同志願機構訪問咗一萬二千幾個中學生，結果發現六成受訪者有輕微至非常嚴重嘅抑鬱；七成半話經常感到低落、沮喪或絕望，近半受訪者更曾諗過自殺或自殘添。負責調查嘅學者形容，本港有情緒問題嘅學生，比率高過外國一半，已經響起警號。

本來呢，年輕人應該朝氣勃勃，無憂無慮至係，點解咁多人唔開心？調查團體係咁講嘅，受訪者主要壓力來自學業，愈高年級情況愈嚴重，呼籲家長同老師多啲關心小朋友，一發現問題就要盡早尋求專業輔導咁話。

其實，香港青少年問題多多，學生抑鬱唔係今日嘅事咯。撒瑪利亞防止自殺會前年處理嘅一千三百幾宗自殺危機個案，十九歲或以下人士佔咗八十三宗，比對上一年大增二十九宗，最細嘅個案只有六、七歲，簡直匪夷所思。

咁又難怪嘅，香港升學壓力大，大學資助學位長期僧多粥少，入大學好似千軍萬馬過獨木橋咁，唔少學生只能夠望門興嘆。有人形容香港教育淨係培養少數精英，但就製造出大批失敗者，真係一啲都冇講錯。試諗下，當一個人由細到大充滿挫敗感，有乜法子唔抑鬱，有乜法子唔低落吖。

再講喇，除咗升學壓力，學生仲要面對其他各種挑戰，心情又點可能輕鬆呢。係人都知，香港經濟結構單調，地產金融獨大，學生畢業後出路狹窄，向上流動仲難過登天。想話自己創業咩，家陣租魔肆虐，成本高昂，好多傳統老店都捱唔住，初出茅廬嘅年輕人創業又談何容易吖。至於住屋問題咯喎，更加係年輕人揮之不去嘅噩夢。最近本報報道一對八十後夫婦上車血淚史，兩人為咗一圓置業夢，餐餐捱麵包，過足幾年節衣縮食嘅生活至儲夠首期，你話係咪淒涼吖。

所以話，年輕人升學、就業、創業、安居路路不通，根本睇唔到未來，加上政棍喺背後挑動教唆，令青少年問題更加惡化。唔怪得愈來愈多年輕人淪為憤青，將怨氣發洩喺街頭運動喇。

以前話少年不識愁滋味，家陣少年識盡愁滋味，講起都可悲。你話嘞，社會未來棟樑自身難保，香港又點會有運行吖，叮！