城中鏡：方剛議政捱到白頭 蒙德揚耍手唔接班
由於立法會批發及零售界議員方剛來屆將退下火線，到底邊個接任議席，業界一直有好多傳聞，早前就傳出「電飯煲大王」蒙民偉之子、信興集團主席兼行政總裁蒙德揚有興趣。信興集團日前舉行年度傳媒聚會，蒙德揚就借呢個機會澄清，話自己對做議員無乜興趣，仲話見到方剛做議員做到頭髮都白晒，點會唔驚呢？
蒙德揚話見到方剛做議員做到頭髮都白晒，所以驚咗做議員。
蒙德揚依家只係五十出頭，信興又係行內龍頭，喺批發及零售界有超然地位，點知佢就表明心迹話無乜興趣做議員。但空穴來風、未必無因，如果佢冇任何動作，到底又點解會有呢個傳聞？蒙德揚好坦白，話早前的確有位人士當面鼓勵佢參選，但成個對話不足一分鐘，而佢亦表明無意，估唔到之後就被流傳佢有意參選，唔通嗰位人兄都有興趣參選，所以想人哋「見光死」，令自己少個對手？
