城中鏡：樂助孩童 「奧巴馬」奏出善心
名媛Alice趙曾學韞前晚舉辦《善學好友慈善演奏會》，更請來美國總統奧巴馬同父異母的弟弟馬克．奧巴馬（Mark Obama）即席演奏鋼琴，歌手李蕙敏、韋綺姍、湯寶如等亦擔任表演嘉賓，星光熠熠。Alice透露全院滿座，並得到善長人翁捐出五十萬元，佢話：「同時都好多謝錢國偉擔任監製，大家做慈善不遺餘力。」
Mark全神貫注彈奏鋼琴。
擔任演奏會監製嘅錢國偉（左起）、Mark同趙曾學韞老友鬼鬼，言談甚歡。
戴蘊慧（右起）、戴辛尉同佢哋媽咪喺開騷前先嚟張合照。
回家鄉非洲慈善探訪
專誠來港嘅Mark，透露將在港逗留數天，之後返回內地。佢坦言好榮幸受到Alice嘅邀請，自己亦為演奏會籌備多時，更專誠創作咗一首好有意思嘅歌曲。佢話：「歌裏面包含咗中國、香港同美國三個地方，每地各一首好著名歌曲嘅旋律。我諗住考吓啲小朋友，最先認得晒三首歌嘅小朋友，我就會送禮物畀佢。」音樂係世界語言，Alice真係好有善心，幫助好多人。
Mark表明將繼續同Alice合作，幫助世界各地需要幫助嘅小孩，又透露將同Alice到家鄉非洲進行慈善探訪。佢話：「我喺肯尼亞出世，美國長大，後來去中國住咗十四年，所以可以話有三個國籍、三種文化。所以我好想幫助唔同地方嘅小朋友，好似非洲咁，嚟緊Alice都會帶醫生去非洲，幫助當地有兔唇同有眼疾嘅人。而我就着重文化同音樂嘅交流，希望可以畀非洲嘅小朋友玩古箏、內地小朋友彈鋼琴。」咁會唔會親身上陣教佢哋？佢話：「唔係一個人可以做得晒，要靠團隊嘅力量，所謂『三人行必有我師』。」
