政壇：搞搞政：真普選民調怕問「袋住先」
政改第二階段諮詢結果將喺下月公布，雖然二十七名泛民主派議員表明會否決政改方案，但代表泛民政黨嘅真普選聯盟（真普聯）似乎前路未明，最近只係靠委託香港大學民意研究計劃做民調，而今個月嘅民調結果同兩個月前差唔多。
設計圖片及對白
真普聯嘅民調再度問及市民對全國人大常委會「八三一」決定嘅意見，咁問法，結果當然係一面倒認為會為香港帶來假普選啦，但點解唔問吓市民係咪支持「袋住先」呢？其實港大民意研究計劃總監鍾庭耀之前提出全民投票計劃，用「公投」方式調查市民對八三一框架下政改方案嘅支持度，而港大法律系教授陳弘毅亦提出公投，但泛民都係無乜反應，莫非同真普聯一樣，都係擔心會多數市民支持「袋住先」？
鍾庭耀暗寸泛民計較
泛民飯盒會早幾日同鍾庭耀會面，但雙方仍未達成共識，泛民各黨表明對公投存有保留，而鍾庭耀尋日都話至今仍未有一名議員表明會根據結果投票，認為就算舉行公投，都冇乜意義。佢相信泛民議員之所以唔支持佢嘅計劃，可能係要考慮日後選舉嘅政治籌碼，暗寸泛民太計較得失。
真普聯召集人鄭宇碩就解釋話，坊間唔少機構都有做關於「袋住先」嘅民意調查，相信多佢一個唔多，少佢一個唔少。不過，佢話會考慮做有關「袋住先」嘅調查，但就要同聯盟成員傾下先喎。睇番佢哋一月做過嘅民調，民意轉向唔明顯，其實真普聯會唔會覺得呢啲民調做完又做為咗乜呢？
