經本報上年二月大篇幅報道教育局密冚教師註冊資料，漠視家長和學生知情權，引起公眾關注後，申訴專員公署日前都公布跟進調查結果，揭發現行機制嘅種種弊端，令到教育局「跪低」，承諾喺今年內就是否同意公開註冊教師名單同有關資料嘅類別作探討，會廣泛諮詢包括教師及專業團體嘅意見。今次申訴專員劉燕卿迫使教育局局長「吳得掂」吳克儉認衰，固然有助保障公眾知情權，但係呢個只係開端，嚟緊仲要加緊跟進吳得掂，免得佢走去搵藉口拖延。
