百度搜索首席財務官李昕晢尋日喺滙豐人民幣論壇上提到,依家每五年就新一代,八十、九十後同老一輩嘅人概念好唔同,唔會再儲咁多錢,唔少更係月光族。同場嘅滙豐亞太區行政總裁Peter王冬勝不知幾認同,話佢幾個細路完全唔介意幫佢使晒啲錢,令到台上台下都爆笑。

王冬勝

家教甚嚴 唔畀亂投資

據知王冬勝位公子,上年啱啱喺美國大學畢業,依家二十三、二十四歲左右。不過,佢屋企家教好嚴,聽講即使係十八歲成年嗰陣,都唔可以自由投資。依家阿仔大學畢咗業,投資買賣應該可以自己話事喇啩,會唔會直接叫富爸爸Peter教番兩手?自己投資掂,唔使靠「父幹」。

其實,好似Peter咁嘅廿四孝阿爸,香港比比皆是。好似花旗銀行啱啱出咗份調查報告都講到明,家陣香港千萬富豪最關注嘅,係仔女嘅教育同謀生,甚至仲着緊過自己退休添!有乜辦法,今時今日啲樓價咁,畀着你做父母嘅,自己可以嘅,點忍心唔出手幫吖!所以,公平啲,咪成日都話啲後生仔女要靠「父幹」,睇怕佢哋都唔想o架!

第一手消息請下載on.cc東網iPhone/iPad/Android/Windows Phone Apps