政壇：鬍鬚曾「舉雙槍」射住大舊
因為舊年十月佔領行動持續，特首CY梁振英推遲咗出席立法會答問大會，所以尋日答問大會算係補番數，但火花欠奉。不過，財爺「鬍鬚曾」曾俊華散會離開時，遇上「拉布」三子社民連「長毛」梁國雄、人民力量「慢必」陳志全同埋「大舊」陳偉業，鬍鬚曾見三子吵吵鬧鬧，於是用雙手做出開槍手勢，射向大舊。
梁國雄（左一）、陳偉業（左二）離遠截擊高官，曾俊華（右一）用雙手做出開槍手勢，射向大舊。
李國章（中）同行會召集人林煥光（右）都閉目養神。
楊偉雄（後排右一）首次以行會成員身份出席答問大會，全程專心聆聽。
話說大舊不滿CY喺答問大會上有關機場第三條跑道問題嘅回應，於是趁CY等人離開時表達不滿，又向同行嘅鬍鬚曾話：「唉，不如同你講，反正佢（CY）都唔應」，於是鬍鬚曾就笑笑口，用雙手做出槍嘅手勢，射向大舊。其實，鬍鬚曾上月到立法會宣讀財政預算案時，長毛就向佢投擲寫上「未來基金」嘅磚頭道具，而長毛被逐離場時，鬍鬚曾就向律政司司長袁國強講咗一句：「It's a good break. I need that（我正需要休息時間）」。
徐英偉圖返建仔遇「辣條款」
而喺嚟撐場嘅行政會議成員當中，包括行會新貴楊偉雄，一開始就同行會成員廖長城密斟，又全程專心聆聽。而另一行會成員、港大校委會成員李國章就同張志剛密斟，但唔知係咪因為前晚港大校委會開會開到好夜，李國章聽到近一個鐘後，就閉目養神足足二十分鐘，就算大舊大聲發問，都冇乜反應。
但係出席嘅副局長同政治助理當中，唔見近日就辭職問題擾擾攘攘嘅民政事務局政助徐英偉，近日流傳因佢要返建仔擔任總幹事一職，政治委任官員離職後工作諮詢委員會就列出唔少離職再就業嘅「辣條款」，搞到佢要焗住留任政助，認真（火羅）爆，唔知係咪因為咁，所以缺席，避吓風頭呢？
