政壇：郭琳廣 左右不是人
有名你叫，獨立監察警方處理投訴委員會（監警會）一直係警隊同市民之間嘅磨心，過去由資深大律師「翟少」翟紹唐出任主席時，尚且可以擺平內部泛民、建制嘅分歧，但自從執業律師郭琳廣舊年「空降」監警會後，建制、泛民居然鮮有合作，連建制陣營都有委員對郭琳廣嘅作風有意見，覺得佢唔熟書、唔聽年資較耐嘅「老鬼」意見等，唔少人仲緬懷翟少任主席嘅時光。
設計圖片及對白
動輒投票 懶理共識
事實上，政府過去都會喺委員會內搵人「升呢」坐正主席，但自從政府愈開愈多委員會，願意走入「熱廚房」出任公職嘅人買少見少，但主席工作吃力亦未必討好。好似郭琳廣咁，我哋聽聞佢接掌監警會短短大半年，梁繼昌同黃碧雲等泛民委員不獲重視，即使立場親建制嘅委員亦各走兩極。
據了解，郭琳廣自從獲「空降」接任主席，反而同年初先獲委任嘅新委員行得更埋，對「老鬼」意見唔多入耳，而且「貴人事忙」。
對比翟少過去開會，為力爭最大多數共識，往往超時開會，但郭琳廣為慳時間，除咗要求準時完會，遇到爭議，動不動就要求委員投票，少數服從多數就當解決問題，好多時候意見未得到共識已經埋咗單。
有「老鬼」透露，至今依然定期約翟少同已經離隊嘅委員敍舊，至於郭琳廣，大家同枱食飯次數幾乎係零。
委員指控郭琳廣嘅「罪名」好難對質，但至少郭琳廣要認真諗吓，點樣修補自己同新舊委員嘅關係。
