過江龍棄養成風 地頭蟲瀕臨滅種

呢，早前城門河驚現鱷蹤，大家都以為係「貝貝事件」翻版，後來先證實虛驚一場，原來只係一條五爪金龍啫。不過咁，咪以為唔係鱷魚就可以掉以輕心，事件反映本港棄養爬蟲類寵物蔚然成風，由於佢哋係外來物種，冇本土天敵，一旦喺野外落地生根，隨時造成生態大災難。

話口未完，本報就發現俗稱中國水龍嘅長鬣蜥，近年大量入侵本港郊區嘞。本報記者聯同專家到港島南區追尋「龍」蹤，結果輕易見到四條中國水龍嘅「真身」，每條長約二十至三十厘米，仲未成年o架。專家係咁講嘅，南區一帶最少住咗三十條中國水龍，部分雌龍更已懷孕，早就形成族群，開枝散葉。由於佢哋係肉食性，昆蟲、蛙類、蛇類甚至雀鳥都會成為佢哋嘅盤中飱，你話本地物種係咪大禍臨頭吖？

即係咁，外來物種大舉入侵，造成嘅破壞真係唔講得笑。台灣新北市早年亦被中國水龍入侵，嚴重威脅台灣本土中華爬岩蚯等生物，當地政府終於忍無可忍，去年展開清除中國水龍行動。仲有呀，美國政府去年大手筆耗資一百八十億美元修建大壩，阻止亞洲鯉魚進入密西西比河，就係為咗保護當地生態。正如本港學者話齋，千祈咪睇小外來物種嘅殺傷力，政府應該及早行動，否則亡羊補牢已經太遲。

所以話，外來物種入侵本港郊區，絕對唔可以等閒視之o架。事實上，本港南區有短腳角蟾等本土原生物種棲息，繼續任由中國水龍失控繁殖，原生物種好快被消失咯。可惜吖，港產官僚出名食嘢唔做嘢，漁護署話喎，喺郊野公園放生爬行動物並唔犯法，但會教育市民唔好胡亂放生。言下之意，即係關人個關囉。話時話，爬蟲類動物走私個案近年不斷上升，唔通署方真係冇責任做嘢嘅咩？

冇計喇，官僚靠得住，豬乸會上樹。咁講啦，對付生態災難，官僚固然有責任，寵物主人更加有責任。動物始終係一條生命，貓貓狗狗又好，蛇蟲鼠蟻都好，養之前真係要停一停、諗一諗。尤其係爬蟲類動物，長大後嘅外形、食量都同小時候有好大分別，有能力有愛心先好飼養呀，叮！