城中鏡：IS招外傭？名人僱主「唔驚得咁多」
近日有外籍傭工喺香港多個同鄉聚腳點派發單張，邀請同鄉出席喺本港舉行嘅一個神秘聚會，據報單張上懷疑印有伊斯蘭國（IS）嘅標誌，引起各界討論關注，事關本港唔少家庭都有聘請外傭，早前喺香港廣州社團總會成立典禮上見到總會永遠名譽會長Margaret梁高美懿，佢話家中外傭雖然唔算由細睇住佢啲仔女長大，但前後相識二十多年，彼此非常熟悉，佢亦會多啲關心對方。
梁高美懿與家中外傭相識二十多年，彼此非常熟悉。
林凱章對入境處、海關等部門嘅情報同把關工作有信心。
劉文文透露家中外傭唔多鍾意出街。
霍震霆（左）同霍啟山都有現身總會成立典禮。
對入境處海關有信心
同場嘅廣州海外聯誼會成員之一嘅Lisa劉文文，亦對據報嘅單張相當關注，又指佢家中聘請嘅印傭平日唔多鍾意出街，放假通常都係留喺屋企，認為未必收過有關單張。對於有指網上資訊發達，唔使外出都可以收到不同訊息，Lisa認為唔驚得咁多，而家中外傭工作咗約三年，暫時都唔覺有乜異樣。
菁英會副主席Victor林凱章家中亦有菲傭，佢認為本港係一個國際大都會，相信無論入境處、海關等部門嘅情報及把關工作，都會做得好好。
講番廣州社團總會嘅成立典禮，當晚筵開百多席，總會中有多名霍家中人嘅身影，其中創會會長係港區全國人大代表霍震寰，佢兄長、立法會前議員霍震霆擔任永遠名譽會長，而霍震霆兩名兒子霍啟剛同霍啟山分別出任副會長同副主席。
