SUN搞作：網絡小說：雙貪大想頭
貪曾貪湯無所事事，踎喺天橋底吹水，忽然講到錢呢個話題，即時口水橫飛，貪湯率先大發偉論：「早排有人爭取美金換頭像，近期又有人提出要台灣硬幣去蔣，我挑，錢主要係畀人攞嚟貪啫，印邊個頭有乜所謂？」
貪曾接道：「班友仔話廿蚊美金上面個Andrew Jackson搞過乜鬼印第安人大遷徙，害死好多條命，所以想換喎。唉，正所謂瑕不掩瑜，本貪曾做凸首夠搞到民不聊生，夠搞到啲中產要為住屋大遷徙啦，依家香港人咪照舊日日關心我問候我全家，所以話，Andrew Jackson唔應該換，反而港幣就要考慮吓放我個頭上去嘞！」
貪湯聞言怕蝕底，又九噏埋一份：「本貪湯都算係有史以來最有代表性嘅老廉專員，我都要提議吓將老廉logo改成我個頭，打擊貪污肯定事半功倍！」
