政府喺○八年開設副局長同政治助理兩層政治委任制度，徐英偉當時出任民政局政治助理至今，係在任最長嘅政助，及至上月先被傳媒披露有意離開政府，據聞政府內部知悉此事後，如意算盤係下月中公布徐英偉離任消息時，一併公布其繼任人，而佢亦會重返「娘家」建仔出任總幹事做「大內總管」，確保雙方都做到「無縫交接」。

設計圖片及對白

要做到雙重「無縫交接」，最緊要係敲定新任政助人選。有政界消息透露，建仔曾向曾德成推薦兩個黨友出任政助，但曾德成都未有照單全收，主因係再由政黨成員接任，會影響外界觀感。

另一方面，曾德成亦唔係一味只等人推薦，決定親自掛帥揀蟀，據知其中一人來自懲教署、比徐英偉更年輕嘅公務員相當符合佢嘅要求，有傳已到達品格審查最後階段，但埋門一腳慘遭滑鐵盧，無緣轉任，難怪曾德成日前同傳媒茶敍，亦話歡迎大家向他推薦合適人選。

據知政府內部最新評估，唔會再強求所謂「無縫交接」，只要徐英偉獲相關諮詢委員會批准離任，政助一職就暫時懸空，直至有合適人選出任為止。

其實民政局副局長許曉暉喺同一職位亦出任長達七年，而現屆政府一二年重組架構時，一度係新設文化局嘅局長大熱人選，最終因文化局開局失敗原職留任。話時話，依家連同佢合作多時嘅徐英偉都有新動向，唔知一旦有人向佢招手，許曉暉會唔會都心郁郁想棄官出外闖一闖呢？

第一手消息請下載on.cc東網iPhone/iPad/Android/Windows Phone Apps