政壇：孫宏斌講起佳兆業一肚火
融創最近買乜都好似有啲阻滯，好似佢哋收購佳兆業，但佳兆業嘅境外債權人又唔肯支持個債務重組方案，難怪一排無露面嘅融創董事長孫宏斌，尋日現身業績記者會都好躁。被人問完佳兆業債權人單嘢又問融綠平台股權爭拗，孫總愈講愈有火，愈講愈大聲。如果用「咆哮」嚟形容，大概都唔差得太遠。佢「地產狂人」個朵係不容質疑嘅。
孫宏斌喺業績會愈講愈有火。
點解唔等佳兆業完成晒債務重組後，融創先入主？孫總話「如果我不進場，這公司春節前就死了，所有員工包括管理層都離職了……公司沒有錢，它活不下去啊！」但係，依家佳兆業境外債權人認為債務重組條款苛刻，點都唔肯簽支持協議喎！孫總直斥啲債權人根本唔了解佳兆業目前情況，甚至仲多番要公司畀債息，佢直頭炮轟：「佳兆業你們（債權人）是買錯了，肯定買錯了，因為它負債表不對的！當你三月三十一號看過佳兆業所有報表之後，你要是還不承認買錯，認為它是好公司的話，你就等它死吧！」
咁融創同綠城就收購融綠合營項目各執一詞單嘢又點？孫總企硬話「已經完成收購」。但九倉早前仲公開講話有意收購喎？孫總一聽到，立即發炮：「 做人做企業你不能這樣，因為你明明作為綠城股東，應該知道它簽了一個合法的合同，你既然知道還說要收購的話……」
睇嚟孫總團火抑壓咗好耐，會上火花四起完全無停過。不過佢轉頭又話體會到任何交易都有風險，過程中最緊要識得判斷同有耐性，就好似搵對象咁。
