政壇：區選未開戰工黨先蒙羞
四名工黨議員最近接連到廉政公署助查，對於係咪同壹傳媒集團前主席黎智英秘密捐款醜聞有關都避而不談，適逢尋日工黨同傳媒聚會，透露積極考慮派出十二名成員參加年底區議會選舉，當問及一批新丁會否擔心政黨最近負面形象影響選情，工黨副主席譚駿賢死撐捐款醜聞唔係影響選情必然因素，暫時未見對手就事件大做文章，強調區選着重地區工作，最緊要係用心、勤力幫助居民解決問題。
工黨一批新丁死撐捐款醜聞唔係影響區議會選情必然因素。
工黨喺二○一一年底成立，今年底將首次派員參與區選，工黨雖然係區選新丁，但選舉策略打算「捨易取難」，派出代表直搗建制派元老票倉，表面睇似乎勇氣可嘉，但觀乎現時政治局勢，似乎冇勝出嘅十足把握。
工黨今次打算派出嘅十二名社區幹事，據聞大部分落區只有一兩年，其中舊年佔領行動中段先加入工黨嘅Simpson宋子明，更係喺四個月前先開始喺沙田小瀝源一帶服務，究竟佔領行動對區選嘅潛在影響有多大，年底自有分曉。
