政壇：毛范唔知醜爭做篋神
特首CY梁振英日前與各界人士茶敍時，點名批評「香港本土」發起人、公文袋嘅立法會議員「正盲毛」毛孟靜係「始作俑者」，帶頭喺尖沙咀「拖篋」，反對內地遊客，有與會者更引述話CY批評正盲毛帶頭反水貨客。正盲毛當日承認「拖篋」係行為藝術，死撐並非唔歡迎內地旅客來港，正盲毛同「香港本土」另一發起人新民主同盟嘅范國威尋日舉行記者會再辯解，其中未被點名批評嘅范國威仲爭住認係拖篋始作俑者，早喺兩年前已拖篋抗議政府打擊水貨客不力。
設計圖片及對白
正盲毛喺記者會上自詡為「反水貨王后」，又指將「拖篋」抗議抹黑本土抗爭係與民為敵。佢更聲稱收到「特首辦更正版本」，指CY當日都有批評范國威，又叫CY有指控就公開講，重申佢哋歡迎旅客來港，只係要求限制「一簽多行」同對個人遊設限。
范國威形容，CY係用烏賊政策，透過抹黑他人去掩飾問題，又自爆兩年多前已經「拖篋」抗議，正盲毛即時和應話范國威先係「真正始作俑者」，兩人其後仲要攞番個篋，模仿當日喺尖沙咀天星碼頭外嘅「拖篋」行動。
博曝光無所不用其極
資料顯示，范國威喺二○一三年施政報告時水貨客上身，突然拉住裝滿奶粉同廁紙嘅手拉車企圖行近CY，但全程冇嗌過口號。依家正盲毛同范國威爭住認做「拖篋」始作俑者，似乎為咗可以增加曝光率，佢哋真係無所不用其極。之不過，佢哋咪當市民咁容易呃先得o架，一睇就睇穿佢哋喺度做爛騷喇！
