反水客荒腔走板 購物城惹火尤物
千呼萬喚始出來。吹咗好耐嘅邊境購物城，終於有望搞得成，咁反水客嘅暴力示威係咪有機會收皮呢？中港矛盾係咪有機會緩和呢？唉，望就咁望啦，但現實邊有咁理想吖。
嗱，有發展商近日宣布，喺落馬洲一帶自行撥出四十二萬平方呎地，以象徵式一蚊租畀非牟利基金會營運購物城，主要售賣本港著名品牌以及奶粉等商品，最快今年十一黃金周前開張咁話。
即係咁，有咗邊境購物城，肯定有助紓緩北區等水貨重災區嘅壓力，連反對派民調都顯示，超過八成市民支持興建邊境購物城，照計激進「驅蝗」分子應該冇藉口再搞搞震。嗱，呢鋪話法要戒嘞。有激進分子已經講到明反對購物城專為水客服務，話咁做等同鼓勵水貨活動，又話擔心當區交通無法負荷喎，照咁睇，反水客示威嘅火頭分分鐘燒埋入落馬洲，搞事者一味咁激，冇人可以預測會發生乜嘢事o架！
諗落都幾好笑，班示威者一時「光復」呢區，一時「捍衞」嗰區，枱面上理由冠冕堂皇，話要還當地居民正常生活空間喎，家陣將購物城搬去遠離民居嘅邊境，咁都要去衝擊，會唔會牽強咗啲呀。
不過大家少同佢哋擔心。正所謂，欲搞之事，何患無辭，對於為反對而反對，為衝擊而衝擊嘅激進派嚟講，又點會理有冇港人受到影響吖。大家有眼見，所謂反水客示威早就完全變調，普通個人遊旅客、本地人以至老弱婦孺，只要示威者睇唔順眼，通通有殺錯冇放過。咪畀人睇死，第時邊境購物城落成，必成惹火尤物，實會有人指摘港府「割地賣港」，邊境淪為「水客後花園」。唔係杞人憂天o架，大家應該記得之前嘅新界東北發展計劃，明明可以紓緩住屋問題，點知畀人以「割地賣港」為名挑起中港矛盾，結果搞到滿城風雨。邊境購物城重蹈覆轍，一啲都唔出奇。
仲有喎，據講邊境購物城部分地段屬於官地，要更改土地用途，必須同政府商討。咁就弊嘞，當局拖拖拉拉固然被人鬧爆，快快手手開綠燈咩，「官商勾結」嘅大帽隨時一嘢笠落嚟，一樣冇好下場嘅咋。
做又死，唔做又死，購物城將來會唔會淪為另一個示威熱點，都幾難講。冇計喇，政府無能，政客無恥，特別係一小撮激進分子，胡攪蠻纏，無事生非，惟恐天下不亂，香港遲早畀佢哋玩死都似，叮！
