城中鏡：梁定宇航海歷險悟抗逆
幫家族打理生意嘅東華三院前主席Billy梁定宇，卸任後不停進修，讀完音樂碩士後，近期又愛上航海，仲考到國際船牌，下一步仲想考初級教練牌添！Billy話香港有條件發展航海產業，建議當局發展航海運動及旅遊，包括多舉辦國際性船賽，既能推動青年人玩船風氣，又可帶動香港經濟喎。
梁定宇冀當局發展航海產業。
Billy謙稱唔係做生意嘅材料，所以近年決定走專業人士路線，投身航海事業。咁大癮，因為玩船樂趣多，既要學睇天氣、風向，仲要掌握船隻維修同急救知識。不過，行船三分險，Billy難忘有個冬夜喺香港水域航行，突然遇上幾米高大浪，船身差點沉沒，幸好隊友奮不顧身救船，終於捱過風浪。經此一役，令佢明白人生順逆難測，即使遇逆境，都要咬緊牙關，再大風大浪都會過去嘅。
