擁有「鬼姐」之稱嘅模特兒Zelia鍾浠文早前一連兩日現身荔枝角擺檔賣個人二手商品，包括衫、袋、化妝品等等，目的就係幫無國界醫生籌款。佢話：「今次攞咗百幾、二百件覺得有價值嘅嘢出嚟賣。至於選擇捐畀無國界醫生，係因為好多落後國家都打緊仗，我係反暴力嘅人，見到好多無家可歸嘅人，無國界醫生可以幫到佢哋，我唔鍾意戰爭同戰鬥，希望世界和平。」

鍾浠文擺檔義賣，幫無國界醫生籌款。

藤製包

毛毛衫

喺現場大概有二、三十家攤檔，而Zelia嘅「鬼姐雜貨舖」屬於受歡迎之一，年輕人除咗買嘢之外，更排晒隊向Zelia「集郵」。問佢最鍾意係邊啲貨品時，佢隨即攞起藝人Yumiko送畀佢嘅粉紅色毛毛衫，同埋舊年去旅行只係用咗兩次嘅粉紅色藤製包包，佢介紹話：「呢啲都係朋友送，有紀念價值，我自己都好鍾意。」再問佢會唔會唔捨得？佢就話：「唔捨得啲袋，因為女仔都鍾意收集袋，但喺屋企嘅時候諗覺得應該捐出自己鍾意嘅嘢同人分享。」兩日以嚟，Zelia透露一共籌得一萬零二百六十元。

第一手消息請下載on.cc東網iPhone/iPad/Android/Windows Phone Apps