商舖租金近年飛漲,開業逾半個世紀、被視為「明星飯堂」嘅佐敦新樂酒樓明日會光榮結業,新樂股東、香港鐘表業總會前主席「華哥」梁青華早前特意搵家人及同事去緬懷一番。華哥話最唔捨得嘅係鎮店炭燒叉燒王,自言只需配一碗白飯已回味無窮,連山珍海味都比唔上。

梁青華(左)同莫大任約定有機會將重開新樂酒樓。

炭燒叉燒王

梁仲元(左)同Angela(右)巧遇吳國敬,即上前合照留念。

梁青華太太(左)同契女黃珞彤品嘗聞名嘅叉燒王。

自新樂傳出結業消息後,幾乎日日爆場。身兼交通安全隊副總監嘅華哥每逢周末假日特別忙,當日下午出席活動前,特登抽空到新樂酒樓回憶過去點滴。當日華哥一行人巧遇自細喺佐敦長大嘅歌手吳國敬,華哥大仔兼香港鐘表業總會會董Raymond梁仲元同華哥秘書Angela即上前合照留念。

入股變私人飯堂

華哥憶述,自己幫襯新樂多年,○三年沙士爆發時,新樂一度落閘停業,後來重組時搵佢入股,終於渡過難關,自此以後新樂成為佢嘅私人飯堂,無論團年飯或請客都喺呢度設宴,幾年前Raymond結婚都喺度擺酒宴客。

其後華哥又細數新樂嘅地道小菜,包括芫荽皮蛋魚雲湯同多款即製點心,仲有過年必食嘅蘿蔔糕同年糕等。講到聞名嘅叉燒王點解咁好味,酒樓第二代兼董事總經理莫大任話,秘訣係明爐炭燒嘅木頭味道滲入肉身,同煤氣燒出嚟嘅味道自然唔同喇!

對新樂結業在即,華哥話唔覺得傷感,事關第日如搵到適當位置,會第一時間搵番有關班底重開。

第一手消息請下載on.cc東網iPhone/iPad/Android/Windows Phone Apps