關乎二○一七年特首普選方案能否獲得通過，關鍵係有冇四、五名泛民回心轉意支持政改，基本法委員會委員陳弘毅過去多個月提出多個方案「試水溫」，最近佢建議政府委託前法官進行政改民調，再邀請泛民進行政改電視辯論，但眼見政府無意參與政改辯論，佢尋日又有構思，話唔一定要特首或司長參與辯論，可由代表支持政改一方嘅建制派代表人物參與，甚至係有意參選普選特首嘅人士都可以考慮，並指可以有多次辯論，每次邀請唔同人士參與，等市民充分了解雙方理據喎。之不過，如果政改電視辯論淪為建制派同泛民代表對決，其實同平日喺立法會大會上各不相讓嘅場面有乜分別呢？咪又係得個亂字。

陳弘毅嘅新提議面世後可謂一石激起千重浪，建制派中人對此意見不一，新民黨主席葉劉淑儀認為，如果辯論只是「口舌之爭」考辯才，相信未必可以推動通過政改方案，又表明現時無必要為特首選舉設「熱身賽」。葉劉其後更留下耐人尋味嘅一句，「就算我要熱身，都唔使參加電視辯論。」

全國港澳研究會副會長劉兆佳形容，依家無論係建制定係泛民都無具代表性人物，認為難以透過民調或電視辯論去改變現狀；另有資深建制派中人亦對電視辯論耍手擰頭，寧可同泛民代表閉門辯論，又話如果泛民想見中央官員，佢哋都可以幫手拉線喎。

對於電視辯論最心思思嘅，可能首選係立法會議員蔣麗芸，事關佢點名想同泛民飯盒會召集人梁家傑辯論，笑言對方身為大狀，口齒必然伶俐，就算自己輸咗都無咁樣衰。

話時話，陳弘毅原意係想政府官員同泛民就政改辯論，時移勢易改為提議建制同泛民對決，其實呢個場面分分鐘同平時扭開電視機，睇立法會直播無太大差別嘞！

第一手消息請下載on.cc東網iPhone/iPad/Android/Windows Phone Apps