政壇：岑智明以百年風災相警世

話說天文台台長岑智明一向有收藏歷史同天文相片，最近佢喺收藏家手中買入一張歷史圖片珍藏，顯示喺一八七四年甲戌風災時中環干諾道嘅相。岑智明話相中可見碼頭附近啲建築物被嚴重破壞，當時有報道話香港死亡人數有成二千至五千人；而人口得一萬五千人嘅澳門，當時則死咗五千人，換言之一場風災就少咗三分之一人口。

岑智明搵到張百幾年前嘅相，希望提醒港人要居安思危。

此外，佢最近仲去到英國國家檔案局尋寶，原本想搵香港天文台嘅建築圖則，點知畀佢發現一張一八六四年香港天文台一帶嘅手繪地圖，上面仲有時任港督羅便臣嘅簽名添！

岑智明話現時天文台所在嘅山頭當時叫伊利近山（Elgin），喺地圖上山腳附近畫有好多大方格，反映好可能當時已有人聚居。佢又話睇地圖發現以前嘅街名好得意，例如尖沙咀竟然有條德輔道，而彌敦道以前就叫做羅便臣道。

講到底，近年見到全球暖化問題愈來愈嚴重，岑智明希望港人見證歷史嘅舊相，可以居安思危，加強警覺性。