議員去立法會開會通常都會着得比較得體,尤其係男議員,大多都披件老西,但係尋日見到漁農界議員「高佬賢」何俊賢,罕有地着咗套深藍色嘅運動裝到立法會開會。唔通開完會去做運動?

因為啲衫入晒箱,何俊賢惟有着運動衫去立法會開會。

非也。高佬賢自爆最近開始搬嘢入新屋,佢媽媽同太太搬得太落力,幾乎執走晒佢衣櫃啲衫,因此佢尋日起身打開衣櫃,幾乎乜都冇晒,得番啲底衫褲同套運動衫,所以惟有着住套運動衫先。之不過,聽日立法會開大會,高佬賢話點都要去新屋執番套西裝着,估唔到佢作為男人都咁貪靚。

第一手消息請下載on.cc東網iPhone/iPad/Android/Windows Phone Apps