今時今日,成功嘅企業除咗要搵到錢外,仲要講究CSR(Corporate Social Responsibility,企業社會責任),而且唔係齋捐錢齋叫口號,直頭畀弱勢社群融入公司日常運作,咁先至算數。

黃碧娟話經過培訓嘅大學生會聯同銀行義工,再教中學生基本理財概念。(資料圖片)

好似銀行公會新任主席黃碧娟咁,佢一上場就搞CSR,話今年三月開始,銀公同聖雅各福群會合作,向三十個大學生,即係分分鐘係未來嘅Banker提供培訓,等佢哋識多啲金融服務業嘅嘢,再由呢班大學生聯同銀行義工,齊齊再教一千五百個中學生啲基本理財概念。

富衛保險尋日開業績簡布會,發現會場啲西餅唔似平日見慣見熟嗰幾味,似乎喺Handmade喎,隻綠茶芝士Cake嘅水準,啲餅邊度嚟?

原來,富衛今年同專門協助智障人士嘅「匡智會」合作做CSR Partner,富衛唔少活動嘅到會食物,都係由匡智會學員負責製作;唔單止咁,富衛Office仲請咗幾位學員做茶水工作添!

第一手消息請下載on.cc東網iPhone/iPad/Android/Windows Phone Apps