立法會財務委員會上月無法喺限期前通過成立創新及科技局嘅撥款申請，令成立創科局嘅程序要推倒重來。立法會今日會討論成立創科局決議案嘅小組委員會，合共有二十三名議員加入，其中建制派有佔優嘅十二人，泛民則有十一人，而當中「拉布三子」社民連梁國雄、人民力量陳志全同陳偉業都有加入，預計決議案有排都未上到大會。

舊年成立嘅小組委員會由工程界WK盧偉國做主席，WK話如果其他議員無異議，佢會繼續爭取競逐主席一職，重申成立創科局係業界共同願望，希望泛民議員唔好「拉布」阻撓議案通過。

立法會大會舊年已通過有關決議案，但是由於財委會最終唔可以通過有關撥款申請，令決議案中有關生效日期嘅條文已經失效，商務及經濟發展局去信立法會決定重提另一項新決議案，似乎係避免到時要喺法律問題上拗嚟拗去。

第一手消息請下載on.cc東網iPhone/iPad/Android/Windows Phone Apps