政壇：孫公想爆料欲言又止

傳媒追問 搭升降機走人

有團體尋日舉行午餐會，孫公、基本法委員會副主任梁愛詩等人都係座上客之一，全國工商聯房地產商會香港分會執委Bosco何顯毅發言時批評，當年孫公話要救市，推出咗「孫九招」，停建居屋、停售公屋，又取消拍賣土地，仲殺咗擁有土地使用權嘅市政局。

被人翻舊帳嘅孫公其後上台發言時，一方面叫Bosco做同學仔，狀作親暱，之後笑言對方一向鍾意撩是鬥非，寸爆指「Bosco嘅記憶同我有啲出入」。孫公其後仲話自己依家唔係公務員，只係一介草民，可以講心入面嘅嘢，並指以前做局長要對立法會議員客客氣氣，依家可以將真相披露。不過，當傳媒問到佢係咪有真相要披露時，佢未有爆料就急急腳搭升降機走人。

除咗孫公，另一個畀Bosco挑機嘅係泛民立法會議員ＫＫ馮檢基。對於被指對政府當年政策唔出聲，ＫＫ反駁，指自己當年有抗議政府有關政策，只係政府唔聽咁話喎。

查實香港回歸近十八年，依家仲有籠屋、劏房問題，究竟係政府過去喺房屋政策冇前瞻性，定係立法會各黨派都有責任，答案其實不言而喻，留待各方自行判斷。