好多人話香港係一塊福地，可惜係過去式咯，近年香港唔知交上乜嘢霉運，福地都變成是非之地，日日家嘈屋閉不特止，最近仲衰到成為極端恐怖組織招攬新血嘅滲透目標，你話係咪大禍臨頭吖？

眾所周知，極端回教組織伊斯蘭國（IS）近年異軍突起，肆虐全球，唔止斬殺人質，仲血洗多國，要幾恐怖就有幾恐怖。好似近日突尼斯博物館及也門清真寺遇襲，死傷枕藉，就係出自IS嘅「手筆」。佢哋仲揚言日本等亞洲地區都係恐襲目標，萬一殺入本港，後果不堪設想。

恐襲無疆界之分，唔係危言聳聽，本報日前獨家報道，有神秘組織在港派發傳單，招攬在港工作嘅印傭加入伊斯蘭國。傳單印有十多名用布包裹全身、只露出雙眼嘅女子手持IS旗幟，仲有「異端」、「培訓」、「獨立」等字眼，都咪話唔得人驚。

咁仲唔止，據聞派發傳單嘅神秘組織，最近廣邀印傭參加一個神秘聚會，出席者包括一名印尼籍學者。呢個學者一啲都唔簡單，本報記者喺佢個社交網站發現大量同IS有關嘅相片，包括佢本人手持長槍及打出支持伊斯蘭國手勢嘅照片。好彩，香港勝在有正義傳媒，多得本報報道，當局今次冇瞌眼瞓，唔止已經禁止該學者入境，仲話留意到本報報道後，已在預防、準備及應變上做工夫，包括加強巡邏外國領事館等高風險地點，制訂應變計劃及進行跨部門演練等等。港府高層仲表明，香港作為全球最開放自由嘅城市，絕對唔會對恐襲威脅掉以輕心，必會防患於未然。

咁就啱嘞，家陣係地球村嘅年代，香港又係國際大都會，每日有大量旅客出入，稍一不慎，隨時被恐怖分子有機可乘嘅咋。話時話，IS早就滲透印尼，連當地反恐機構都估計最少有五百名國民加入，香港目前有十幾萬印傭，成為招攬目標一啲都唔出奇。再講吖，內地官方早前亦證實，有新疆極端分子參加IS後回流犯案。所以話，恐怖活動看似好遠、其實好近，香港點可能獨善其身吖！

講到呢度，真係要讚一讚正義傳媒觀察入微，唔止為民喉舌，仲為本港保安把關。點都好，預防勝於治療，反恐寧緊勿鬆。家陣香港政治爭拗已經夠晒多，幾乎無日安寧，萬一恐怖分子都嚟摻一腳，香港想唔玩完都幾難，叮！

第一手消息請下載on.cc東網iPhone/iPad/Android/Windows Phone Apps